Det første universitetsstyremøtet i år vart halde ved Campus Kristiansand 31. januar.
Jobba med neste strategi
Samtidig som det går føre seg tematiske workshopper, møter med alle institutt og fellesadministrative avdelingar og at det blir opna for interne og eksterne innspel, gjennomførte også universitetsstyret eit eige strategiseminar.
Seminaret vart fasilitert av UiAs Colab-team og temaa det vart jobba med var dei same som kjem på dei opne workshoppene neste veike.
Planane i einingane for 2024
Universitetsstyret tok forslaga til årsplanar for dei ulike fakulteta, Avdeling for lærarutdanning og administrasjonen til orientering.
I november vedtok universitetsstyret den overordna årsplanen, og no følgjer einingane opp med planane sine for korleis dei skal bidra til å oppnå måla i UiAs strategi. Dette er det siste året i inneverande strategiperiode, og ny strategi blir no utvikla ved universitetet. Planen er å vedta ny strategi for 2025-2028.
Sjå innhaldet i kvar einings plan:
- Fakultet for helse- og idrettsvitskap
- Fakultet for teknologi og realfag
- Fakultet for samfunnsvitskap
- Fakultet for kunstfag
- Fakultet for humaniora og pedagogikk
- Handelshøgskulen ved UiA
- Avdeling for lærarutdanning
- Administrasjonen
Arbeidar vidare for kunnskapssenter på campus
UiA er inne i eit samarbeid med Vitensenteret Sørlandet (Arendal kommune) kvar vi planlegg etableringa av eit nytt kunnskapssenter på Campus Kristiansand. Dagens kunnskapssenter i Kristiansand skal flytte, og det er eit ønske om å etablere dette i eit nytt bygg på campusen til universitetet.
Universitetsstyret fekk presentert status i samarbeidet, og gav universitetsdirektøren fullmakt til å jobbe vidare mot ei slik etablering.
Saksdokumenta er lukka for offentlegheita då dei inneheld informasjon om prisar i ein konkurranseutset marknad.
Vedtok UiAs investeringsplan
Universiteta har høve til å setje av pengar frå løyvinga si til investeringar. Planen for framtidige investeringar ved UiA er på 35,8 millionar kroner:
- Oppgradering av forskings- og læringsareal – 10 millionar kroner
- Solceller ved Campus Grimstad – 2,7 millionar kroner
- Ombygging av atriet ved Campus Grimstad – 5 millionar kroner
- Ombygging av undervisningskjøkken ved Campus Kristiansand – 3,9 millionar kroner
- Ombygging av Østsia-lokala ved Campus Kristiansand – 4,1 millionar kroner
- Ombygging av lokala til IT-avdelinga ved Campus Kristiansand – 5 millionar kroner
- Inventar og utstyr til UiAs del av det planlaga Vitensenteret ved Campus Kristiansand – 5 millionar kroner
Dette er ein investeringsplan som kan reviderast ved endra behov, prioriteringar og budsjettsituasjonen.
Andre utvalde saker
- Etter ønske frå Fakultet for helse- og idrettsvitskap vedtok styret å leggje ned etter- og vidareutdanningsstudiet Personleg trenar på bakgrunn av svake søkjartal
- Universitetsstyret tok tildelingsbrevet frå Kunnskapsdepartementet for 2024 til orientering, og valde kven frå styret som skal delta på etatsstyringsmøtet 15. mai
- Endringar i forskrift om opptak til studium og emne vart vedtekne
- Styret vart orientert om at rektor på fullmakt har vedteke ein auke i talet på studieplassar frå 5 til 20 på spesialpedagogikk 1
- Styret vart orientert om planlaga styresaker for 2024