Eit seminar om akademisk e-sport ved UiAs Insituttt for IKT har ført til diskusjonar om samarbeid med internasjonale aktørar. UiA er no i sluttfasen med å fullføre samarbeidsavtalane.
– Dette viser at arbeidet vårt er ettertrakta internasjonalt. Målet med internasjonale partnarar er at vi kan vera aktive og synlege både globalt og lokalt. Vi kan dele idear om akademisk e-sport, det gir UiA større merksemd i forskingsmiljøet innanfor feltet.
Det seier førsteamanuensis Tobias Scholz. Han forskar på akademisk e-sport ved Universitetet i Agder (UiA).
Saman med førstelektor Rune Andersen har han vore med og sikra nye samarbeidsavtalar som kan bidra til å styrkje akademisk e-sport på universitetet.
Samarbeid om forsking og studentar
Framover vil det bli forskingssamarbeid med forskar Seth Jenny frå Slippery Rock University i USA og Volker Stein frå Universitetet i Siegen i Tyskland.
Det vil også bli samarbeid om studentutveksling frå Staffordshire University i Storbritannia, University of Mississippi og University of Texas i USA.
I tillegg blir det etablert eit treningssamarbeid innanfor e-sport med Høgskulen i Mittweida i Tyskland. Vidare blir det planlagt eit studentprosjekt saman med den norske e-sportorganisasjonen Apeks.
Meir enn berre spel
Dei siste åra har e-sport auka i popularitet og raskt blitt eit globalt fenomen. For mange har det blitt meir enn berre spel.
Det er eit levebrød for nokon, og fleire bedrifter ser verdien av å ha tilsette med ferdigheiter innan e-sport.
Ifølgje Scholz er det avgjerande å samarbeide med internasjonale partnarar for å kunne forme næringslivet og samfunnet for e-sport i framtida.
– Dei nye avtalane gir oss høve til å samarbeide med universitet og studentar over heile verda, inkludert studentutvekslingar med andre universitet. Det gir også moglegheiter for eit breitt spekter av hybridforelesingar og samarbeid med e-sportlag frå andre universitet for trening og konkurranse, seier han.
Vidare vil Scholz understreke at nye internasjonale samarbeidspartnarar vil bidra til større forskingsmoglegheiter. Både når det gjeld finansiering, deling av ressursar og etablering av eit eige doktorgradsnettverk.